Hochwasser

 

Das Objekt

Der Lyssbach brachte viel Verwüstung und Leid nachLyss.
Mit vereinten Kräften versuchen alle noch Schlimmeres zu verhindern.
Mit dem neuen Stollen bleibt das Wasser jetzt im Flussbett und niemand muss sich mehr fürchten.

 

Standort

Bei der Brücke Aarbergstrasse (beim Wasserrad) unter der Brücke Richtung Zentrum.

 

Der Künstler

Gruppe Skulptur 

 

Der Sponsor

Schweizerische Mobiliar, Versicherungsgesellschaft, Generalagentur Lyss

https://www.mobiliar.ch/versicherungen-und-vorsorge/generalagenturen/lyss 

 

 

 

Die Geschichte:

 

DIE GESCHICHTE HOCHWASSER ANHOEREN: 

 

 

 

Eine Geschichte von Achim Parterre

 

Hochwasser  (Achim Parterre)


Är heig sech veränderet, het mer d Christine verzeut, der Bruno heig sech eifach irgendwie
veränderet, sit er bi dere Versicherig schaffi, är sig, wi söu si säge, vorsichtiger worde, ja
fasch e chli ängstlech. Outofahre tüeg er nume no, wes gar nid angersch göng, mit
Bänklischutte heig er ganz ufghört u sis Rennvelo heig er uf Ricardo.ch gsteut. U o ds
Schaffe im Garte oder im Hushaut sig ihm mittlerwile z risikoriich.
Si frag sech scho, het d Christine gseit, öb das der richtig Job sig für eine wi der Bruno. Der
Bruno, wo früecher gäng sone Luschtige sig gsi, so fröhlech u spontan u ohni viu z studiere
aapackt heig, denn won er no uf em Grüschtbou sig gsi. U jeden Aabe, wenn er sig heicho,
heig er irgend e Gschicht verzeut, vom Polier sim Hund, vomne kuurlige Chund, aber hütt,
aus Schadeguetachter bi dere Versicherig, auso si wüss nid... Der Bruno sig doch eifach z
sensibu für das u verzeue tüeg er o nüt meh, dörf gar nid, heig Schwigepflicht. I söu mer das
mau vorsteue, het d Christine gseit, der Brünu u Schwigepflicht! Aber klar sige si froh gsi,
heig denn d IV die Umschuelig zaut, denn won der Bruno hingertsi abem Grüscht sig gheit,
aber usgrächnet zure Versicherig! Är hät doch gschider Lehrer gmacht, Lehrer bruuchs
gäng, Lehrer sig e sichere Bruef, aber item, het der Bruno haut Schadedienschtmitarbeiter
gmacht u scho ds Jahr druf isch er zum Schadeguetachter ufgstige u hütt het är en
abwächsligsriiche u aspruchsvoue Job u verdieni meh weder denn uf em Grüscht.
Si wöu nid chlage, überhoupt nid, aber letschti heigs ere gliich fasch eine ggä! Chöm doch
ihre Bruno plötzlech i Hochwasserhose derhär. Der Bruno wo gäng gluegt het, dass er ou
optisch e Faue macht, chunnt i Hochwasserhose derhär. Us Sicherheitsgründ, het er zur
Christine gseit. Si heig de no am gliichen Aabe sire Chefin es Mail gmacht, öb si der Bruno
nid chönnt i Innedienscht näh – us Sicherheitsgründ. Ja klar, het d Chefin gseit, mir näh der
Bruno i Innedienscht. Us Sicherheitsgründ. Aber d Hochwasserhose, die blibe, wiu o dert
packe d Mitarbeiter aui a.

 

 

 

 

 

 

 

 

 

 

 

Drucken E-Mail

Wetter in Lyss

Kontakt

Verein Tourismus Lyss - Marktplatz 15 - 3250 Lyss 

Tel. +41 32 387 07 40
(Reception
Hotel Weisses Kreuz, Lyss)

 Mail an Tourismus Lyss