Mühlegeist

 

Das Objekt

Der Geist spricht für sich.

 

Standort

Bei der reformierten Kirche.

 

Der Künstler

Hans-Rudolf Lotz-Mühlethaler

Er lebt und arbeitet in Bern (während 20 Jahren in der Münsterbauhütte Bern).

 

Der Sponsor

Verein Kulturwerkstatt Mühle, Lyss

 

 

Die Geschichte:

 

DIE GESCHICHTE MÜHLIGEIST ANHOEREN: 

 

 

 

Eine Geschichte von Achim Parterre

 

Mühligeist

Vor mäng hundert Jahr hets z Lyss e Mühli gä, wo mit emne Fluech beleit isch gsi. Einisch im Jahr het der Müuer Bsuech bercho vom schwarze Zünder. Är isch mit emne Sächsspänner vorgfahre u uf em Wage het er schwäri Seck gha, wo d Müuersgseue i d Mühli treit hei. Der schwarz Zünder het d Tür vo inne bschlosse u der Müuer u sini Gseue hei sibe Täg lang ke Fuess dörfe i d Mühli setze. D Lysser hei e Wuche lang ke Brot me gha, weu der schwarz Zünder ds Mäu won er gmacht het, i Lyssbach gschosse het. Nach sibe Täg hei d Müuersgseue di sächs Ross wider igspannt u der schwarz Zünder isch dervogfahre.

Einisch, wos wider so wit isch gsi, u der schwarz Zünder mit sim Sächspänner vorgfahren isch u d Gseue di schwäre Seck i d Mühli treit hei u der Zünder ganz allei het afa mahle, hets der Müuer nümm usghaute u är het eine vo sine Müuersgseue i d Mühli gschickt: är söu sech ineschliche u beobachte, was der schwarz Zünder dert in tribi. Chridewiiss isch er i zrügg cho. Der Müuer het ne gfragt, was er gseh heig u är sou doch ändlech verzeue! Aber der Gseu isch i ds Stroh gläge u het kes Wort fürebracht. U am Tag, wo der schwarz Zünder abgfahren isch, het me der Müuersgseu müesse beärdige. Ds Jahr druf het der Müuer wider e Gseu i d Mühli gschickt, är söu ga luege, was der schwarz Zünder ir Mühli in Gheims tribi. Aber o däm Gseu isch es nid besser ggange. Är isch zrügg cho u het kes Wort meh usebracht u o für ihn het d Wuche druf ds Toteglöggli glütet. Itz isch am Müuer der Zapfen ab u är het beschlosse, säuber ga z luege, was i sire Mühli los isch. Wo ds Jahr druf der schwarz Zünder wider zuechegfahren isch, het sech der Müuer imene Sack versteckt. D Müuersgseue hei ne i d Mühli ine treit u ne zu den angere Seck gleit. Der Zünder tuet der erscht Sack uf u der Müuer ghört, wi öpper seit: „La mi la ga! La mi la ga!“ Aber der schwarz Zünder het scho der Dröschflegu ir Hang u dröschet u dröschet u dröschet, bis d Spröi vom Weize suber trennt isch u är schuflet der Weize uf e Mühlistei u mahlet u mahlet u mahlet, bis aues nume no fiins Mäu isch. De tuet er der zwöit Sack uf u der Müuer ghört, wi wider öpper rüeft: „La mi la ga! La mi la ga!“ Aber der schwarz Zünder dröschet u dröschet u mahlet u mahlet u scho macht er der nächscht Sack uf. Won er der Sack uftuet, wo der Müuer dinn isch, luegt er ne mit bösen Ougen aa u seit em: „Du weisch, dass jede muess stärbe, wo gseh het, was hie in passiert.“ Aber der Müuer, wo gar nüt gseh, aber aues ghört het, packt der schwarz Zünder mit sine Riisehäng u stopft ne i Sack, bingt der Sack zue u hänkt ne i ds Mühlirad ine.

Dert dräit er no hütt, der schwarz Zünder. We me guet luegt, gseht me der Sack, win er i ds Wasser itoucht u wider u uftoucht u wider itoucht. D Lysser Mühli isch sider vom Fluech befreit. Aber es söu ja nie e Müuer uf d Idee cho, dä Sack abzhänke!

 

 

 

 

 

 

 

 

 

 

 

Drucken E-Mail

News aus Lyss

    


 

Infos hier

 


Beitrag vom Lokalfernsehen Lyss über die Entstehung und Geschichten rund um die ReLYef

zum Beitrag

 LolyLogo klein

 


Film über Lyss (zur Verfügung gestellt von der Gemeinde Lyss)

Lyss in Wort und Ton

 


Wetter in Lyss

Kontakt

Verein Tourismus Lyss - Marktplatz 15 - 3250 Lyss 

Tel. +41 32 387 07 40

 Mail an Tourismus Lyss